Ошто турак үйдөн чыккан өрт кафенин чатырын дагы күйгүзүп кетти

Ошто турак үйдүн чатырынан өрт чыккан. Натыйжада ага жанаша жайгашкан "Ансар" кафесинин чатыры дагы күйүп кеткен. Бул тууралуу ӨКМнын маалымат кызматы кабарлады.

Маалыматка ылайык, окуя 29-июнь күнү таңкы саат 4:06 чамасында катталган.

"Ош шаарындагы Достук кичи районунун 44-көчөсүндө жайгашкан турак үйдүн чатырынан өрт чыгып, анын жанындагы “Ансар” кафесинин чатыры дагы күйгөн. Өрттү өчүрүү үчүн жалпы 5 өрт өчүрүүчү бөлүм тартылып, таңкы саат 4:57де чектөөгө алынган. Ал эми саат 6:51де өрт толугу менен өчүрүлгөн. Өрттүн кесепетинен чатырдын жалпы 550 чарчы метр аянты күйгөн. Өрттөн жабыркагандар жана каза болгондор жок", - дейт маалымат кызматы.

Учурда өрттүн келип чыгуу себептери жана келтирилген материалдык чыгымдар такталууда.