Бурулайдын атасы: "Экспертиза кызымдын көкүрөгүнө тартылган жазууну жок деп тыянак чыгарыптыр"

Милициянын бөлмөсүндө бычакталып каза болгон Бурулайдын атасы Турдали Кожоналиев медициналык экспертизанын жыйынтыгына макул эмес. Мындай пикирин ал SUPER.KG порталына билдирди.

Анын айтымында, экспертиза Бурулайдын көкүрөгүндөгү Н+Б деген жазууну жок деген тыянак чыгарып берген.

"Кызымдын көкүрөгүндөгү жазууну жок деп чыгарышыптыр. Бирок биз тартып алган сүрөттү көрсөтсөк, ооруканага келгенде дефибриллятор аппараты колдонулган. Ошондон калган так деп жатышат. Бирок ал аппараттан мындай так калбайт деп мага дарыгерлер айтышты. Мындан улам биз сөөктү эксгумация кылууну талап кылып жатабыз", - деди Турдали Кожоналиев.

Эске салсак, ушул жылдын 27-майында 29 жаштагы жигиттин кызды ала качып бара жаткандыгы боюнча Биринчи Май РИИБине кабар келип түшкөн. Мындан көп узабай Сосновка айылындагы посттон Чүй ОИИББинин кызматкерлери Subaru Outback үлгүсүндөгү унааны токтотуп, 29 жаштагы жигиттин 20 жаштагы кызды үй-бүлө куруу максатында ала качып бара жатканын аныктап, Жайыл РИИБине жеткиришкен. Милиция бөлүмүндө жигит кызды бычактап, андан кийин өзүнө да бир нече жолу бычак сайып жиберген. Кыз алган жаракатынан улам көз жумган. Ал эми жигиттин кесиптештери анын ичимдик ичпеген, ишине так бала экенин билдиришкен. Анын абалы оор экенин Жайыл райондук ооруканасынын башкы дарыгери айткан.

Бул окуя боюнча Жайыл райондук прокуратурасы Кылмыш-жаза кодексинин 316-беренеси (шалаакылык) боюнча Жайыл РИИБинин кызматкерлерине кылмыш ишин козгогон.