Индияда бир үй-бүлөнүн 11 мүчөсүнүн жансыз денеси табылды

Индияда бир үй-бүлөнүн 11 мүчөсүнүн жансыз денеси өз үйүнөн табылды. Бул тууралуу батыш маалымат булактары жазып чыкты.

Маалым болгондой, Индиянын Нью-Дели шаарында бир үй-бүлөдөн 11 адам каза болгон. Алардын 10у короонун ичинде жипке асынып калган. Кызыгы, алардын бардыгынын көздөрү таңылган. Ал эми 70 жаштагы аялдын жансыз денеси үйдүн ичиндеги бөлмөдөн табылган. Маркумдардын денесинен эч кандай тактар табылган эмес жана эч кандай кол салуунун издери аныкталган эмес. Мындан улам полиция кызматкерлери эч кандай кол салуу болбогондугун айтышууда. Ошондой эле эч кандай кат калтырышпаганын маалымдаган.

Үйдүн кожоюну дүкөн иштеткен, сүт азыктарын чыгарган ферманы жетектеген жеке ишкер болгондугу айтылат маалыматта. Үй-бүлө мүчөлөрүнүн каза болгондугу тууралуу анын кошунасы аныктаган. Ал кошунасы менен күндө эртең менен сейилдөөгө чыкчу. Кошуналары каза болгон үй-бүлө мүчөлөрү жакында боло турган үлпөт тойго кызуу даярданып жатканын кошумчалаган.

Учурда табышмактуу өлүмдүн сыры тактала элек. Полиция кызматкерлери окуяны териштирүүдө.