"ЭЛДИК КАБАРга" жооп: Консулдук кызмат департаменти: "Екатеринбург шаарындагы башкы консулдукка жарандарды ылдам тейлөө боюнча сунуштар айтылды"

Орусиянын Екатеринбург шаарында иштеп жүргөн мигрант Дастанбек Султанов SUPER.KG порталынын "Элдик кабар" бөлүмүнө кайрылып Кыргыз консулдугуна нааразычылыгын айткан.

"Консулдуктун кызматкерлеринин бизге болгон кайдыгер, орой мамилеси көптөн бери токтобой келе жатат. Барсаң улгайган адамсыңбы, бала менен келдиңби эске албайт, баарын кезекке тургузуп, көпкө күттүрөт", - деген ал.

Биз бул тууралуу Кыргыз өлкөсүнүн Тышкы иштер министрлигинин Консулдук кызмат департаментине кайрылганыбызда мигрант Дастанбек Султановдун нааразычылыгы Екатеринбург шаарындагы башкы консулдукка маалымдалганын билдирип, мындан ары жарандарды ылдам тейлөө боюнча сунуштар берилгенин айтышты.

"Башкы консулдукка кайрылып, кезекте турган жарандардын арасында ымыркай балдары бар же жашы улгайган жарандар болсо аларды алгачкы кезекте тейлөө жөнүндө тийиштүү сунуштар берилген. Бирок ошол эле учурда кезекте турган башка жарандардын нааразычылыктары болбошу шарт. Ошондой эле Консулдуктун жооптуу кызматкерлерине ылдам иштөө жана ишти жүргүзүү боюнча сунунштар берилген", - деди Консулдук кызмат департаментинин директорунун орун басары Алмаз Букалаев.