Сапар Исаковдун жактоочусу менен УКМКнын тергөөчүсүнүн соту эртеңкиге жылдырылды

Мурдагы премьер-министр Сапар Исаковдун иши боюнча сотко эртеңкиге жылдырылды. Бул тууралуу анын адвокаты Нурбек Токтакунов билдирди.

Анын айтымында, бүгүн саат 9:00дө УКМКнын тергөөчүлөрүнүн үстүнөн жазылган арыз каралмак. "Алар Сапар Исаковго козголгон кылмыш иши боюнча материалдарды берүүдөн баш тартышкан. Бүгүнкү соттук отурумга тергөөчү жана прокурор келген жок. Мындай көрүнүш УКМКнын жана прокуратуранын сотко болгон терс мамилесин көрсөтүүдө: бир гана судьяга эмес, сот адилеттигине. Соттук отурум эртең саат 13:30да болмокчу", - деди Токтакунов.

Эске салсак, Сапар Исаковго 29-май күнү "коррупция" беренеси менен айып тагылган. Бир нече жолу суракка чакырылгандан кийин ал 2 айга камакка алынган. Бишкектин Биринчи Май райондук соту Исаковдун баш коргоо чарасын өзгөртүп, УКМКнын СИЗОсуна тергөө бүткөнгө чейин камоо чечимин кабыл алган.

Исаковдун жактоочусу Нурбек Токтакунов Улуттук коопсуздук мамлекеттик комитетинин тергөөчүсүнүн үстүнөн сотко арыз берген. Ал Сапар Исаковдун ишин тергеп жаткан УКМКнын тергөөчүсү аталган иш боюнча материалдардын көчүрмөсүн бербей койгондугу үчүн арызданганын айткан. "Бул кадам Кылмыш-жаза кодексине каршы келет. Бул УКМКнын тергөөчүнүн статусунун маанисин билбейт дегенди түшүндүрөт", - деген жактоочу.