"Ош базарында" 2 милиция кызматкерин сабап кетишкен

Бишкектеги "Ош базарынын" жанынан эки милиция кызматкерин сабап кетишти. Бул тууралуу Бишкек ШИИББинин маалымат кызматы билдирди.

Маалыматка ылайык, окуя 30-июнь күнү кечки саат 10:00дө Чүй кең көчөсү менен Бейшеналиева көчөсүнүн кесилишинде орун алган.

"Бизге 30-июнда кечки саат 10:00 чамасында "Ош базарында" белгисиз адам тапанча көтөрүп жүрөт деген маалымат келип түшкөн. Жерине 2 милиция кызматкери барып, шектүүдөн өзүн тааныштырып, документтерин көргөзүүсүн суранган. Ал документтерин барсеткадан чыгарып жаткан учурда милиция кызматкерлери тапанча бар экенин байкап калышкан. Биздин кызматкерлер аны кармоо учурунда кылмышка шектүү каршылык көргөзүп, элге "мага атайылап тузак кылып жатышат" деп жардамга чакыра баштаган. Анын кыйкырыгын уккандар дароо эле жардамга келип, милиция кызматкерлерин ур-токмокко алышкан. Укук коргоо кызматкерлери окуяны түшүндүрүүгө аракет кылганы менен, жардамга келгендер алардын сөзүн уккан эмес. Окуя болгон жерге Ленин РИИБинин ыкчам тобу барып, окуяны жөнгө салган. Ал эми кылмышка шектүү катары 1998-жылы туулган Т.М. аттуу жаран кармалган. Ал жанына пневматикалык тапанча ал жүргөн. Учурда ага карата 241-беренеси (ок атуучу куралдарды, ок-дарыларды, жарылуучу заттарды жана жарылуучу жасалгаларды мыйзамсыз сатып алуу, берүү, сатып өткөрүү, сактоо, ташуу же алып жүрүү) менен кылмыш иши козголду. Учурда ал убактылуу кармоочу жайга киргизилип, иликтөө иштери улантылып жатат", - дейт маалымат кызматы.