Канат Исаевдин иши боюнча жабык соттук отурум эртеңкиге калды

Бүгүн, 4-июлда Бишкек шаарынын Биринчи Май райондук сотунда Канат Исаевдин үстүнөн козголгон кылмыш иш боюнча соттук отурум өттү. Саат 16:00дө башталган отурум 18:00гө чейин созулуп, жумуш убактысы бүтүп калгандыгына байланыштуу иш эртең саат 08:30дан тартып улантылмай болду. Мындай маалыматты SUPER.KG порталына Канат Исаевдин жактоочусу билдирди.

Эске салсак, Канат Исаевге Башкы прокуратура тарабынан 2017-жылдын 30-сентябрь күнү "кылмышка даярдануу", "массалык баш аламандык" жана "бийликти күчкө салып тартып алуу же бийликти күч менен кармап туруу" беренелери боюнча кылмыш иши козголуп, УКМК тарабынан кармалган.

Буга чейин Исаевге козголгон дагы бир кылмыш иши мөөнөтү өтүп кеткендиктен 28-июнда токтотулган. Мындай чечимди Бишкек шаардык соту чыгарган. Исаев 2008-2010-жылдары Токмок шаарынын мэри кызматын аркалап турганда "пара алууга жол берген жана кызмат абалынан пайдаланган" деп айыпталган.