Сооронбай Жээнбеков ШКУга мүчө мамлекеттердин жогорку аудит органдарынын өкүлдөрүн кабыл алды

Президент Сооронбай Жээнбеков Шанхай кызматташтык уюмуна мүчө мамлекеттердин жогорку аудит органдарынын өкүлдөрүн кабыл алды. Бул тууралуу президенттик аппараттын басма сөз кызматы билдирди.

Маалыматка ылайык, Эсептөө палатасынын төрагасы Улукбек Марипов 4-июлда Бишкекте аталган уюмга мүчө мамлекеттердин жогорку аудит органдарынын өкүлдөрүнүн IV жолугушуусу өткөнүн айтты. Ал билдиргендей, анда мамлекеттик аудиттин көйгөйлөрү жана келечеги талкууланды. "Биз көп нерселер жөнүндө сүйлөштүк, анын ичинде өлкөбүздөгү коррупция менен күчөтүлгөн күрөш тууралуу", - деди Марипов.

Мамлекет башчысы аталган уюм ар түрдүү мамлекеттик жана бизнес түзүмдөрүнүн өкүлдөрүнүн ачык баарлашуусунун эффективдүү куралы болуп баратканын билдирди.

"Шанхай кызматташтык уюмуна мүчө мамлекеттердин узак мөөнөттүү коңшулаштыгы, достугу жөнүндө келишимдин жоболорун ишке ашыруу боюнча 2018-2022-жылдарга иш-аракеттер планын бекиткенбиз. Бул план экономика, коопсуздук, илим, билим тармактарында, маданий мурастарды сактоодо күч бириктирүүгө, идеялар, инновациялар, практикалык тажрыйбаны активдүү алмашууга жардам берет деген үмүттөмүн", - дейт Жээнбеков.

Президент уюмдун алкагында эл аралык инвестициялык долбоорлорду, өзгөчө энергетика жана транспорт тейлөөлөрүндө, коррупцияга каршы күрөшүү жаатында ишке ашырууга бөлүнгөн мамлекеттик каражаттарды колдонуу боюнча биргелешкен аудиттерди өткөрүү болуп каларына ишенимин билдирди.