Кыргыз сому КМШ өлкөлөрүндөгү эң туруктуу валюталардын катарын толуктады

Кыргыз сому КМШ өлкөлөрүндөгү эң туруктуу валюталардын катарын толуктады. Бул тууралуу чет элдик маалымат каражаттары жазып чыгышты.

Маалыматка ылайык, Bloomberg экономикалык басылмасынын аналитиктери КМШ өлкөлөрүндөгү улуттук валюталардын наркы акыркы жылдары канчага өзгөргөнүн изилдешкен. 2018-жылдын биринчи жарым жылдыгынын жыйынтыгы боюнча орусиялык рубль 8,64 пайызга арзандаган, ал эми украиналык гривендин наркы 7,4 пайызга кымбаттаган.

Басылмада жазылгандай, рубль акыркы 5 жылдагы эң төмөн көрсөткүчтү көрсөткөн. Украинадан кийин жакшы көрсөткүчтөрдү грузиялык лари (6,1 пайыз), молдавиялык лея (1,69 пайыз), кыргыз сому (1,14 пайыз) көрсөткөн.

"Орусия эң негизги соода өнөктөшү болгон Казакстан жана Беларусь өлкөлөрүнүн валюталарына АКШнын апрелдеги санкцияларынын кесепети таасир эткен", - деп жазылат маалыматта.