Жети-Өгүздө 13 жашар кызды "балмуздак, суусундук алып берем" деп алдап, айылдашы ыплас иш-аракеттерди жасоого аракет кылган

Ысык-Көл облусунун Жети-Өгүз районунда 13 жашар кызды зордуктоого аракет кылган жаран кармалды. Бул тууралуу SUPER.KG порталына Ысык-Көл ОИИБинин басма сөз кызматы билдирди.

Маалыматка ылайык, 2-июлда 13 жашар кыздын атасы арыз менен кайрылган. Арызда атасы кызын айылдашы Э.Т. аттуу жаран унаасына салып алып, зордуктоого аракет көргөнүн жазган.

"Бул факт боюнча ыкчам иликтөө тобу шектүү катары 1976-жылы туулган жаранды кармашкан. Ал эми кыздан милиция кызматкерлери эмне болгонун сураганда төмөнкүлөрдү айтып берген. "Мени машинасына салып, балмуздак, суусундук алып берип, мени менен жатчы деп суранды. Ал мага ыплас иш-аракеттерди жасоого аракет кылды. Качан гана атамды көрүп калганда унаадан түшүрө салып, качып кетти" деп көрсөтмө берди. Ошондой эле өз көрсөтмөсүндө бир ай мурун үйдө эч ким жоктугунан пайдаланып, шектүү зордуктаганын кошумчалады. Кыздын айткандарынын канчалык деңгээлде чын экенин аныктоо үчүн соттук-медициналык экспертизалар дайындалган. Бирок анын корутундусу чыга элек", - деди маалымат катчы.

Ал эми бул факт боюнча Жети-Өгүз РИИБи Кылмыш-жаза кодексинин 129-беренесинин 3-бөлүмүнүн 1-пункту менен (жашы жете элек кызды зордуктоо) кылмыш ишин козгоду. Шектүү убактылуу кармоочу жайга киргизилген.