Өзбекстанда коңшусун өлтүрүп качып жүргөн жаран Кыргыз өлкөсүнөн кармалды

Өзбекстанда адам өлтүргөн жаран Кыргыз өлкөсүнөн кармалды. Бул тууралуу Баткен ОИИБинин басма сөз кызматы билдирди.

Маалыматка ылайык, шектүү жаран ушул жылдын 13-июнунда саат 20:22 чамаларында кармалган.

"Өзбек Республикасынын Фергана облусунун Богдод районунун Утарма айылынын 28 жаштагы тургуну М.Э. Кыргыз Республикасынын кайтаруудагы мамлекеттик чек арасынан эч каттоосуз өтүп, Баткен облусундагы айылдардын биринде жүргөн жеринен кармалган. Баткен РИИБинин кызматкери Эркибек уулу Бекболот кармаган. Шектүү менен сүйлөшүп, текшерүү иштерин жүргүзгөндө, Мелибаев Нурали эртең менен өзүнүн кошунасы менен пикир келишпестиктерден улам ага бычак сайып өлтүрүп, окуя болгон жерден Кыргыз Республикасына мыйзамсыз качып чыккандыгын билдирген. Баткен РИИБи бул маалыматтын канчалык деңгээлде чындыгы бар экенин билүү максатында текшерүү үчүн коңшулаш Өзбек мамлекети менен сүйлөшүүлөрдү жүргүзгөндө М. Э. Өзбекстан Республикасынын Фергана облусунун Богдод РИИБи тарабынан 13-июндан бери өзгөчө оор кылмышты (адам өлтүрүү) жасагандыгы боюнча изделип жаткандыгы аныкталган. Азыркы күндө Баткен районунда Мелибоев Нурали Эркинжондун үстүнөн Кылмыш-жаза кодексинин 346-беренеси (Мамлекеттик чек арадан мыйзамсыз өтүү) менен кылмыш иши козголуп, убактылуу кармоо жайына киргизилди" , - деди маалымат катчы.