Деңизде 1 жыл 6 ай мурун жоголгон аял тирүү табылды

Индонезияда 1 жыл 6 ай мурун деңизде жоголгон аял тирүү табылды. Бул тууралуу чет элдик маалымат каражаттары жазып чыгышты.

Белгилүү болгондой, куткаруучулар аны ал жоголгон пляжда ошол эле кийими менен табышкан. 2017-жылдын январь айында 52 жаштагы Нининг Сунарсих Ява аралында жайгашкан Сукамбуми шаарына жакын жерде эс алып жаткан. Күбөлөрдүн айтып берүүсүндө күтүүсүздөн келген чоң толкун Сунарсихти кум жээктен деңизге тартып кеткен. Толкун катуу жана чоң болгондуктан бир дагы адам аны куткарууга бел байлаган эмес.

Куткаруучулар аялды бир нече жума издешип эч кандай жыйынтык чыкпагандыктан издөө иштерин токтотуп койгон. Бирок Сунарсихтин туугандары аны өлдү деп эсептегенден баш тартып өз алдынча издөөнү улантышкан. 30-июнь күнү алар Нининг Сунарсихти жоголгон жеринен алыс эмес жерде жайгашкан пляждан таап алышкан.

1,5 жыл мурун жоголгон Сунарсих эс учун жоготкон абалда табылып дароо ооруканага жеткирилген. Дарыгерлер анын абалы оор экенин, бирок жакында абалы турукташарын билдиришкен.

Азыркы тапта 1 жыл 6 ай дайынсыз болгон Сунарсихтин иши иликтенүүдө.