Башкы штаб: "Кырсыкка кабылган тик учак альпинисттерди куткарууга эмес, тамак-аш жеткирүүгө бараткан"

9-июль күнү эртең менен өлкөнүн Куралдуу күчтөрүнүн Башкы штабынын тик учагы Хан-Теңири чокусуна жакын жердеги Түштүк Эңилчек мөңгүсү тарапка кулап түшүп, ичинде отурган төрт адам жаракат алган. Алардын бири котормочу болсо, үчөө Башкы штабдын аскер кызматкерлери болушкан. Башкы штабдын басма сөз катчысы Гүлзат Жарашеванын SUPER.KG'ге билдиришинче, алар Хан-Теңири чокусунда жүргөн чет өлкөлүк альпинисттерге тамак-аш, дары каражаттарын алып бара жатышкан.

"9-июль күнү кырсыктан жабыр тарткан бир котормочу, үч аскер кызматкери Бишкекке алынып келип, дарыгерлердин колуна өткөрүлүп берилди. Дарыгерлердин айтымында, алардын абалы жакшы. Ал эми жабыркаган адамдар менен бирге эки альпинист дагы келди. Биздин топ аларга тамак-аш, дары каражаттарын жеткирүүгө бара жатышкан", - деди Жарашева.

Ал эми кырсыкка кабылган Ми-8 МТВ үлгүсүндөгү тик учактын абалы боюнча азырынча маалымат айтыла элек.