Аптаптуу ысык дагы бир канча күнгө созулат. Адис шарты жок жайлардагы сууга түшпөөгө чакырды

Аптаптуу ысык дагы бир канча күнгө созулат. Өзгөчө кырдаалдар министрлигинин Суучулдар кызматынын башчысы Урматбек Шамырканов буга байланыштуу 10-июлда өткөргөн маалымат жыйында ата-энелерге кайрылып, кичинекей балдарды сууга түшүүдө кароосуз калтырбоого чакырды. Андан сырткары, сууга түшүүгө шарты жок жайларга барбоо керектигин эскертти. Анын айтымында, Чүй облусунда эле сууга түшүүгө 360 жай бар болсо, 13 жайдын гана сууга түшүүгө шарты бар.

"Күн ысык болуп жаткандыктан сууга түшүү үчүн шарты жок жайларга барбоого чакырабыз. Андан сырткары, сууга түшүүнү билбегендер жээктен ыраак кетүүгө же терең чумкууга болбойт. Спирт ичимдигин ичип түшүүдөн да алыс болуу керек. Өзгөчө кичинекей балдарды сууга түшүүдө жалгыз калтырып же өзүн жибербеңиздер. Балдар кароосуз калып, сууга чөгүп кетип жаткан учурлар көп болуп жатат", - деди Шамырканов.

Шамырканов Өзгөчө кырдаалдар министрлиги суучулдардын санын көбөйтүү аракетин көрүп жатканын кошумчалады. "Биздин суучулдардын санын көбөйттүк. Андан сырткары жеке компаниялар менен муниципалдык кызматтарга куткаруучуларды окутуп берип жатабыз. Жеке компаниялар акча төлөсө, муниципалдык кызматтардын кызматкерлери акысыз окушат", - деди Шамырканов.