Өлкөдө орточо айлык акы биринчи жарым жылдыкка карата 15 миң 397 сом деп эсептелди

Улуттук статистика комитетинин 2018-жылдын 1-жарым жылдыгына карата өлкөдөгү орточо айлык акынын өлчөмү 15 миң 397 сом (чакан ишканаларды эсептебегенде) деп жарыяланды. Бул тууралуу Улуттук статистика комитетинин басма сөз кызматынан кабарлашты.

Маалыматка ылайык, 2017-жылдын ушул мезгилине салыштырмалуу айлык акы 7,4 пайызга өскөн, керектөө бааларын эске алуу менен эсептелген реалдуу өлчөмү 4,7 пайызга өскөн. Ал эми бюджеттик эмес чөйрөдөгү айлык акынын жарым жылдыкка карата орточо көлөмү 21 миң 159 сом деп жарыяланган.

“Эсептелген орточо эмгек акынын өсүү темпинин жогорулашы экономикалык ишмердиктин түрүндөгү ишканаларда жана уюмдарда байкалды. Бирок эң олуттуу жогорулашы курулушта (18,6 пайыз), маалымат жана байланыш (22,2 пайыз), башка тейлөө ишмердиги (21,6 пайыз), мамлекеттик башкаруу жана коргоо, милдеттүү социалдык камсыздоо (12,9 пайыз), кесиптик, илимий жана техникалык ишмердик (10,4 пайыз), кыймылсыз мүлк операциялары (8,9 пайыз), ошондой эле электр энергия, газ, буу жана кондицияланган аба менен камсыздоо (8,6 пайыз) чөйрөсүндө байкалды”, - деп жазылат маалыматта.

Ошондой эле 2018-жылдын II кварталында жашоо минимумунун суммасы киши башына алганда орточо эсеп менен 4 миң 899,15 сомду түзгөн.