Албек Ибраимовдун үзөңгүлөшү болгон "Дастан" ишканасынын жетекчиси Юрий Васильев камакка алынды

"Дастан" трансулуттук корпорациясы" ачык акционердик коомунун башкармалыгынын төрагасы Юрий Васильев кармалды. Бул тууралуу бүгүн, 12-июлда Улуттук коопсуздук боюнча мамлекеттик комитетинин басма сөз кызматы кабарлады.

Маалыматка ылайык, Юрий Васильев "Күнөстүү жээк" пансионатынын акцияларынын 100 пайызы төмөндөтүлгөн баада сатылганына байланыштуу Кылмыш-жаза кодексинин 171-беренеси (ишенип берилген мүлктү ыйгарып алуу же жок кылуу) менен козголгон кылмыш ишине байланыштуу кармалган.

"Дастан" ААКсы Ысык-Көлдүн жээгиндеги 11,7 гектар жер тилкесинде жайгашкан пансионаттын акцияларынын 100 пайызына ээ болчу. Эс алуучу жайдын жетекчилиги пансионаттын оңдоосу үчүн ачык акционердик коомго 24 миллион 504 миң 923 сом карыз болуп калган.
2013-жылдын 15-февралында Юрий Васильев Э.А. аттуу жаранга пансионатты 47 миллион 750 миң сомго төмөндөтүлгөн баада саткан. Ошондой эле, Юрий Васильев жогорудагы 24 миллион сомдон ашуун карыздан да баш тарткан.
Эсептөө палатасы бул келишимдин натыйжасында "Дастан" ААКсынын жоготуусу 128 миллион 379 миң 500 сомду түзгөнүн, андан тышкары пансионаттын карызы болгон компаниянын ишенип берилген активи 24 миллион 504 миң 923 сом сарп кылынганын билдирген", - деп жазылат маалыматта.

Юрий Васильев УКМКнын тергөө абагына камакка алынып, учурда тергөө иштери жүрүүдө.

Эске салсак, Бишкек шаарынын мэри Албек Ибраимов "Дастан" ишканасын жетектеп турган учурда болгон сатып алуулар боюнча ага кылмыш иши козголгон.

Маалымат үчүн: 2011-2012-жылдары - Албек Ибраимов "Дастан" трансулуттук корпорациясы" ачык акционердик коомунун башкармалыгынын төрагасы болуп турган.