Бакиевдин тушунда киши колдуу болуп каза болгон депутаттар, журналисттер, спортчулар

2005-2010-жылдар аралыгында Кыргыз коомчулугуна белгилүү коомдук-саясий ишмерлер, депутаттар, журналисттер, спортчулар киши колдуу болуп каза болушкан. Бул аралыкта Курманбек Бакиев президент болуп турган. Төмөндө Бакиев башкарып турган мезгилде киши колдуу болуп каза болгондордун тизмеси.

Үсөн Кудайбергенов

2005-жылы 10-апрелде коомдук ишмер, каскадёрлор тобунун жетекчиси Үсөн Кудайбергеновду үйүнө кирип бара жаткан жеринен белгисиз бирөө атып кеткен. Кудайбергенов 2005-жылдын 24-мартындагы окуянын негизги катышуучуларынын бири болгон.

Баяман Эркинбаев

2005-жылы 21-сентябрда Жогорку Кеңештин депутаты Баяман Эркинбаев киши колдуу болуп көз жумган. Аны саат 22:00 чамасында үйүнө кайтып келе жаткан учурда белгисиз бирөө атып кеткен. Ал алган жаракатынан улам ооруканага жетпей жан берген. Депутатка ушул эле жылдын 29-апрелинде дагы кол салуу болуп, анда атылган ок мурдун жанып кетип, аман калган.

Тынычбек Акматбаев

2005-жылы 20-октябрда Жогорку Кеңештин депутаты Тынычбек Акматбаев №31-колонияга барган учурунда абакта жаткандар тарабынан ок атылып, өзү жана жан сакчылары каза болгон.

Раатбек Санатбаев

2006-жылы 8-январда кечки саат 20:00 чамасында Бишкектеги 7-кичи райондо инисинин үйүнүн алдынан грек-рим күрөшү боюнча спорттун чебери, атактуу балбан Раатбек Санатбаевди белгисиз бирөөлөр атып кеткен.

Рысбек Акматбаев

Кылмыш дүйнөсүнүн авторитети аталган Рысбек Акматбаевди 2006-жылдын 10-майында саат 18:00дөн өтүп калган маалда Бишкекке жакын Көк-Жар айылындагы мечиттин жанынан белгисиз адамдар атып кеткен. Бул окуяга чейин ал Жогорку Кеңештин депутаттыгына шайланган, бирок мандатын ала элек болчу.

Жыргалбек Сурабалдиев

2005-жылы 10-июнда парламенттин депутаты Жыргалбек Сурабалдиевди Бишкектин борбордук бөлүгүнөн атып кетишкен. Кол салуу түшкө маал Орус драма театрынын жанында болгон, ага унаадан ок чыгарышкан. Сурабалдиевдин жан сакчысы да ок чыгаргандар менен атышууда жаракат алып көз жумган.

Айбек Алимжанов

2006-жылы 15-октябрь күнү саат 20:30 чамасында Ош шаардык кеңешинин депутаты жана шаардагы өзбек улуттук маданий борборунун президенти Айбек Алимжановду Ош шаарындагы кафелердин биринен белгисиз бирөөлөр атып кеткен.

Алишер Саипов

2007-жылдын 24-октябрында өзбек тилдүү "Саясат" гезитинин башкы редактору Алишер Саиповду белгисиз адамдар атып кеткен.

Юрий Александров

2008-жылы 7-март күнү "Вечерний Бишкек" гезитинин журналисти Юрий Александров жубайы экөө дайынсыз жоголушкан. Экөөнүн жансыз денелери бир нече күндөн кийин табылган.

Анвар Алиев

2008-жылы 4-августта Баңгизат бизнеси менен күрөшүү бөлүмүнүн начальнигинин орун басары, полковник Анвар Алиевди белгисиз бирөөлөр атып кеткен.

Бахтияр Амиражанов

Ошол кездеги Жогорку Кеңештин КСДП фракциясынан депутаты Жусупжан Жээнбековдун уулу Бахтияр Амиражанов 2008-жылы 24-сентябрда Бишкек шаарынан дайынсыз жоголгон. Анын сөөгү бир жылдан кийин Чоң-Кемин аймагынан табылган.

Руслан Шаботоев

Жогорку Кеңештин КСДП фракциясынан депутаты Руслан Шаботоев 2008-жылы 30-сентябрда дайынсыз жоголгон. Анын сөөгү толук бир жылдан кийин Байтик айылынан табылган. Тергөөнүн жыйынтыгына таянсак, Шаботоев менен казак крим чөйрөсүнүн өкүлдөрүнүн бири менен жолугушууда жаңжал чыгып, ал ок чыгаруудан көз жумган. Бирок бул жыйынтыктын аныгына эч ким кепилдик бере албайт.

Медет Садыркулов

2009-жылы 13-мартта Казакстандын Алматы шаарынан келе жаткан президенттик администрациянын экс-башчысы Медет Садыркулов жанындагы адамдары менен каза болгон. Алардын сөөгү өздөрүнүн өрттөнгөн унаасынын ичинен табылган. Кийин бул өлтүрүү Бакиевдер тарабынан жасалган деп айтылган.

Санжар Кадыралиев

2009-жылы 14-апрелде Жогорку Кеңештин депутаты Cанжар Кадыралиевди Бишкектеги Бөкөнбаев жана Ибраимов көчөлөрүнүн кесилишиндеги үйүнүн жанынан атып кеткен.

Геннадий Павлюк

Кыргыз коомчулугуна белгилүү журналист Геннадий Павлюк 2009-жылы 16-декабрда каза болгон. Аны Казакстандын Алматы шаарындагы көп кабаттуу үйлөрдүн биринен колу-буту байланган бойдон ыргытып жиберишкен. Ал оппозициялык маанайдагы журналист болгон жана Ибрагим Рустанбек псевдоними менен белгилүү болгон.