УКМК коррупциялык иштерден өндүрүлгөн каражаттар үчүн ачылган атайын эсепке дагы 13 миллион сомдон ашык каражат төктү

УКМК коррупциялык иштерден өндүрүлгөн каражаттар үчүн ачылган атайын эсепке дагы 13 миллион сомдон ашык каражат төктү. Бул тууралуу Улуттук коопсуздук комитетинин басма сөз кызматынын маалыматында айтылат.

Маалыматка ылайык, УКМК коррупциялык иштерден өндүрүлгөн каражаттар үчүн ачылган атайын эсепке 12-июль күнү 13 миллион 300 миң сом төккөн. Айта кетсек, ушул эле эсепке УКМК мындан мурда 95 миллион 900 миң сом акча каражатын которгону белгилүү болгон. Буга ылайык аталган мамлекеттик органдын бүгүнкү күнгө карата төккөн каражатынын жалпы суммасы 109 миллион 200 миң сомду түздү.

Ошондой эле Башкы прокуратура да атайын эсепке 39 миллион сом төккөнү белгилүү болгон.

Эске салсак, 22-июнда премьер-министр Мухаммедкалый Абылгазиев коррупциялык иштерден өндүрүлгөн каражаттар үчүн атайын эсеп ачуу боюнча токтомго кол койгон.