"10-класста окуган кызымды белгисиз балдар зордуктап кетти" дейт кимге кайрылар айласын таппаган эне

"10-класста окуган кызымды белгисиз балдар зордуктап кетти" деген билдирүүсү менен SUPER.KG порталына Токтогул районуна караштуу Өзгөрүш айылынын тургуну Г.Б. аттуу айым кайрылган.

Анын айтымында, 12-июль күнү белгисиз 2 жигит анын Ө.к.А аттуу кызын унаага салып кетишкен.

"Кызым өзү ден соолугунун мүмкүнчүлүгү чектелген, жакшы сүйлөй албайт, 12-июль күнү кызымды белгисиз 2 жигит унаага салып кетишкен. Кызымды издеп жүрүп 13-июль күнү түнкү саат 02:00дөр чамасында кошуна Жетиген айылында жайгашкан мүрзөлөрдүн арасынан таптык. Кызымды тапканда ал ур-токмокко алынганын көрдүк. Моюнунда муунткандан калган тактар жана көзү көгөрүп шишип калыптыр. Кийин кызым аны уурдап кеткен балдар зордуктаганын айтты", - дейт Г.Б.

Кордук көргөн кыздын апасынын айтымында, алар милицияга арыз жазып кайрылышкан. Жыйынтыгында Чоңко айылынын 2 тургуну кармалган. Ал эми судмедэкспертиза, тактап айтканда, гинеколог кыздын зордукталбагынын айтып жыйынтык чыгарып берген.

"Гинеколог кызымды текшерүүдөн өткөрүп ал зордукталган эмес деген жыйынтык чыгарды. Ал эми кызым аны унаага салып кеткен балдар зордуктаганын айтып жатат. Мен экспертизанын жыйынтыгы туура чыкканына күмөнүм бар. Азыркы тапта биз Токтогул райондук ооруканасынын хирургия бөлүмүндө дарыланып жатабыз", - дейт Г.Б.

Жабыркаган кыздын апасы тийиштүү органдар ишти өз көзөмөлүнө алып ден соолугунун мүмкүнчүлүгү чектелген кызына кордук көрсөтүп зордуктаган адамдарды камакка алуусун суранат.