Бишкек ШИИББи: "Милиция менен жаңжалдашкан чет элдик жарандар Кыргыз жеринде мыйзамсыз жүрүшкөн"

Бишкекте милиция кызматкерлери менен жаңжалдашкан чет элдик үч жарандын экөө Кыргыз жеринде мыйзамсыз жүргөн. Бул тууралуу Бишкек ШИИББинин башчысы Сталбек Рахманов 16-июлда өткөргөн маалымат жыйынында билдирди. Анын айтымында, алар өлкөдө мыйзамсыз жүрүшкөндүгү үчүн Свердлов райондук соту тарабынан депортация кылуу чечими чыккан. Сот чечими күчүнө кирсе, алар өз өлкөсүнө чыгып кетет.

"Үчөө тең туристтер эмес болчу. Алар Кыргыз жерине келип, жумуш издеп жүрүшкөн. Экөөнү Свердлов райондук соту тарабынан депортация кылуу чечими чыккан. Бирөө гана мугалим болуп иштеп жаткан. Сот чечими күчүнө киргенден кийин алар Кыргыз жеринен чыгып кетет", - деди Рахманов.

Белгилей кетсек, 3-июль күнү кечки саат 20:20лар чамасында кайгуул күзөт кызматкерлери Бишкекте жол эрежесин бузган чет элдик жөө жүрүүчүлөрдүн документтерин текшерүүгө алышып, түшүнбөстүктөн улам ортолорунда жаңжал чыккан.