Орусиядагы Кыргыз жарандары президент менен депутаттарды миграция көйгөйүн чечүүгө чакырды

Орусиянын президенти Владимир Путин 27-июнда мигранттарды каттоо эрежелери боюнча мыйзамга кол коюп, мыйзам 8-июлда күчүнө кирген. Ага ылайык, Орусияда иштеп жүргөн чет өлкөлүк жарандар жашаган жери аркылуу гана каттоого туруусу зарыл экендиги көрсөтүлгөн. Башкача айтканда, чет өлкөлүк мигранттардын мурдагыдай иштеген жерине каттоого туруусуна тыюу салынган. Орусиялык ЖМКлардын маалыматына караганда, мыйзамды бузган чет өлкөлүк жарандар Орусия аймагынан чыгарылып, жумуш берүүчү тарап 800 миң рублге айыпка жыгылмакчы.

Бул жагдайга Орусияда иштеген Кыргыз жарандары тынчсызданып, өз пикирлерин социалдык түйүндөрдөгү баракчалары аркылуу билдиришүүдө. Алардын бири Санкт-Петербург шаарында жашап жана иштеп жүргөн Бакыт Сулайман аттуу Кыргыз жараны президент Сооронбай Жээнбеков менен Жогорку Кеңештин депутаттарына видеокайрылуу жасап, көйгөйдү чечип берүүнү өтүндү.

"Урматтуу биздин эл шайлаган президент Сооронбай Шарипович, урматтуу депутаттар, мен, Бакыт Сулайман, Орусиянын Санкт-Петербург шаарынан жалпы Орусияда жүргөн мекендештердин атынан атайын кайрылуу жасап жатам. 8-июлда Орусияда мигранттарды мурдагыдай иштеген жерине каттоо токтотулуп, жашаган жери аркылуу гана каттоого турууга болот деген миграциялык жаңы мыйзамга кол коюлду. Орусиянын жарандары деле факты түрүндө каттоого турган жеринде жашабайт. Бул чет элдик мигранттарга, анын ичинде Кыргыз жарандарына абдан көйгөйлөрдү жаратат. Футбол бүтө электигине байланыштуу Орусиянын укук коргоо органдары рейддерди күчөтүлгөн тартипте жүргүзүшө элек. Ошентсе да Москвада жана башка ири чоң шаарларда бир аздан болсо да башталды. Ошондуктан ЕАЭБдин алкагында, мамлекеттик деңгээлде бийлик өкүлдөрү Москвага келип, бул маселени атайын чечип берүүгө аракет кылып көрсөңүздөр. Болбосо, мен сыяктуу миллионго жакын мигрантка кыйынчылык жаралууда. Бизге ЕАЭБдин алкагында мурдагыдай эле иштеген жерибизде каттоого турууну калтырууну сурап көрсөңүздөр. Антпесе мигранттардын 99 пайызы башка жактарга каттатуу менен иштеп жатышат. Себеби чоң-чоң шаарларда эч ким өзүнүн үйүнө 3 айлык каттоого турууга уруксат бербейт. Каттоого турган учурда дагы бир батирде 20-30дан болуп жашагандыктан баарын каттоого тургузууга мүмкүн эмес. Ошондуктан биздин көйгөйдү чечип берсеңиздер", - деп кайрылды Бакыт Сулайман.

Белгилей кетсек, миграциялык жаңы мыйзам күчүнө кирген күндөн бир күн өткөндөн кийин Таганск районунда полиция кызматы 70ке чукул Кыргыз жаранын кармап, райондук полиция бөлүмүнө жеткирип текшерүүгө алышкан. Көпчүлүгү документтери туура болгондуктан үйүнө коё берилсе, 30у бөлүмдө кармалып отурушкан.

Орусиядагы Кыргыз элчилигинин маалымат кызматынан SUPER.KG'ге кабарлашкандай, кармалгандардын баары ошол күнү үйлөрүнө чыгарылган. "Кармалган Кыргыз жарандарынын баары ошол күнү үйлөрүнө жиберилген. Бирок мындай текшерүүлөр мындан ары да жарыяланып турат", - деп билдиришти элчиликтен.