ЭЛДИК КАБАР: "Атасы 4 жашар кызын зордуктаганы тууралуу маалыматты окуп алып ыйлагым келип отурат" дейт окурман

"Атасы 4 жашар кызын зордуктаганы тууралуу маалыматты окуп алып ыйлагым келип отурат" деген билдирүүнү окурман "Соңку кабар" бөлүмүнүн "ЭЛДИК КАБАР" рубрикасына жөнөткөн.

Окурмандын айтуусу боюнча, WhatsApp`тагы мугалимдердин группасы аркылуу атасы 4 жашар кызын зордуктаганы тууралуу маалымат келген. Бул маалыматты Жалал-Абад облусуна караштуу Ноокен районунун Кочкор-Ата шаарындагы №28-мектептин социалдык педагогу тараткан. Анда ал аялы каза болуп калган кошунасы өзүнүн 4 жаштагы кызын зордуктады деп шектенип жатканын жана окуя кандай болгондугу тууралуу жазган.

Ал өз билдирүүсүндө окуя 12-июль күнү болгонун, милиция кызматкерлерине кайрылганын, бирок милиция кызматкерлери окуяга өз көзү менен күбө болбогонуна байланыштуу 4 жашар кыздын атасын коё берип жиберишкенин жазган.

"Бул окуя азыркы тапта кызуу талкууга алынып жатат. Окуяны окуп алып тынчым кетти. Анткени менин дагы кыздарым бар, мен дагы энемин. Ушул окуяны тактап, тийиштүү органдар чара көрсө", - деп билдирген окурман.

Бул маселе боюнча SUPER.KG порталы жогоруда аталган мектептин социалдык педагогу З.Ш.ны таап, аны менен байланышканда төмөндөгүлөрдү билдирди.

"Социалдык тармактагы группа аркылуу тарап жаткан маалыматты жазганым чын. Кошунамдын жубайы каза болуп калган. Ал 4 жашар кызы, карындашы менен чогуу турат. Кыз жакшы каралбайт. Бул окуяга чейин балкондо туруп деле "кызыңды кордогондон көрө, көчөдөгү сойку кыздарга барбайсыңбы" деп карындашынын кыйкырганын кошуна угуптур, бирок маани бербептир. Кошуналар деле буга чейин шекшип жүрүшүптүр, бирок эч нерсе айтышпаптыр. Азыркы тапта мен милицияга сурак берип жатам. Ал эми кыздын чоң апасы "сен жалган маалымат тараттың" деп мени сотко бергени жатат. Өзүм мугалим болуп туруп бул ишке кайдыгер карап тура алган жокмун. Тийиштүү органдар дыкат иликтөө жүргүзүп, туура жыйынтык чыгарат деп үмүттөнөм", - дейт мугалим.