7-Апрель көчөсүнө мурдагы атын кайтаруу демилгесине нааразы болгондор чыгышты

"Айкөл Ала-Тоо" уюму Бишкектеги 7-Апрель көчөсүнө мурдагы атын кайтаруу демилгесине нааразы болууда. Уюмдун активисттери бул маселе боюнча төмөнкү кайрылууну жөнөтүштү.

"7-Апрель көчөсүнө кайра мурдагы атын койдурам деп коомго бүлүк салып жаткандардын негизги максаты - бакиевдик режимди алып келип, "Апрель элдик революциясынын" баалуулуктарын жокко чыгаруу!

2010-жылдын 7-апрель күнү 87 мекендешибиз курман болуп, элибиз Бакиевдин үй-бүлөлүк, кландык, криминал аралашкан режимин кулаткан. Ошол күндөн тартып өлкөбүз жаңы жол менен өнүгүп баштады. Мурдагыдай буюртма менен бир дагы саясий өлүм болгон жок. Алмазбек Атамбаев өз бийлигин тынчтык жолу менен өткөрүп берди.

Айрым саткын саясатчылар биздин элдин айкөлдүгүн пайдаланып, биздин кечээки тарыхты бурмалап, Апрель революциясынын баалуулуктарын талкалап жатат. Биз Бакиевдин заманынын кайтып келишин жана үй-бүлөлүк-кландык башкарууга жол бербейбиз! Өзүн коомдук активист деп көчөнүн атын өзгөртөм деп жаткандардын иш-аракетин акылсыздык жана провокатор деп баалайбыз!" - деп айтылат кайрылууда.

Буга чейин "Биздин укук" коомдук фондунун жетекчиси, юрист Калича Өмүралиева Бишкек шаарындагы Шабдан баатыр көчөсүн 7-Апрель деп өзгөртүү мыйзамсыз экенин билдирген. "Шабдан баатыр көчөсүн 7-Апрель деп өзгөртүү боюнча токтом кээ бир мыйзамга каршы келет. Өкмөттүн токтомуна ылайык, 2020-жылга чейин көчөлөрдүн атын өзгөртүүгө мораторий киргизилген. Биз райондор аралык сотуна кайрылдык. Сотко берердин алдында Бишкек шаардык кеңешке кат жазганбыз. Бирок алар көчөнүн атын өзгөртүүнү артка кайтарып алган жок. Ошондуктан сотко кайрылууну туура көрдүк" деген укук коргоочу.

Айта кетсек, Бишкектеги Шабдан баатыр көчөсүн 7-апрель деп өзгөртүү сунушу 2017-жылы "Айкөл Ала-Тоо" жана "Мекен шейиттери" коомдук уюмдары тарабынан көтөрүлүп, алар ошол кездеги президент Алмазбек Атамбаевге кайрылышкан. Атамбаев бул сунушту Бишкек шаардык кеңешине жиберген. Шаардык кеңеш сунушту колдогон.