Канат Исаевдин агасы: "Инимдин үй камагына чыкканын сүйүнүч менен кабыл алып жатабыз"

Жогорку Кеңештин депутаты Канат Исаевдин үй камагына чыкканын анын агасы Талантбек Исаев сүйүнүч менен кабыл алып жатканын айтты. Бул тууралуу ал бүгүн, 18-июлда SUPER.KG порталына билдирди.

"Иним жок дегенде үйдө болот. Анча-мынча сүйүнүч менен кабыл алып жатабыз. Азырынча эч нерсе бүтө элек, иши кайрадан тергөөгө жөнөтүлдү. Акыйкат каралып, акыйкат чечим чыгат деген үмүттөбүз", - деди Талантбек Исаев.

Бүгүн Канат Исаев үй камагына чыгарылды.

Эске салсак, Канат Исаевге Башкы прокуратура тарабынан 2017-жылдын 30-сентябрь күнү "кылмышка даярдануу", "массалык баш аламандык" жана "бийликти күчкө салып тартып алуу же бийликти күч менен кармап туруу" беренелери боюнча кылмыш иши козголуп, УКМК тарабынан кармалган. 5-июлда Биринчи Май райондук соту депутат Канат Исаевдин мурунку баш коргоо чарасын күчүндө калтырып, ишти кайра тергөөгө жөнөткөн.

Буга чейин Исаевге козголгон дагы бир кылмыш иши мөөнөтү өтүп кеткендиктен 28-июнда токтотулган. Мындай чечимди Бишкек шаардык соту чыгарган. Исаев 2008-2010-жылдары Токмок шаарынын мэри кызматын аркалап турганда "пара алууга жол берген жана кызмат абалынан пайдаланган" деп айыпталган.