Арашандын тургундары УКМК Албек Ибраимовду үйүнөн күч колдонуп алып кеткенин айтып беришти (сүрөт)

Бишкектин мурдагы мэри Албек Ибраимов 19-июлда Арашан айылындагы үйүнөн кармалып, камакка алынган. Бүгүн, 20-июлда SUPER.KG'ге аталган айылдын тургундары Албек Ибраимовду УКМКнын атайын даярдыктагы бөлүгүнүн кызматкерлери күч колдонуп алып кетишкенин айтып беришти. Алардын бири Сабырбек Алкыштиевдин айтымында, атайын даярдыктагы кызматкерлери Ибраимовду кармоо үчүн анын жан сакчыларын жана жумушчуларын сабап салган. Алардын бири оор жаракат алып, ордунан тура албай калган болсо, айрымдары жеңил жаракат алган.

"Албек Ибраимовду УКМКга алып кеткенин анын үйүндө иштеген балдардан барып уктум. Алардын айтканына караганда, 30дай атайын даярдыктагы бөлүгүнүн кызматкерлери үйгө колдоруна курал-жарак алып кирип, үйдүн сыртынан кайтарган күзөтчүнү, жумушчуларды жана жан сакчыларын кошо сабашыптыр. Бул окуя видеотасмага тартылып калгандыктан анын дискин да жулуп алышыптыр. Бул иш туура эмес. Муну деген басмачылык деп коёт. Өзгөчө жан сакчысын катуу сабаган экен, эки бөйрөгү ооруп, ордунан тура албай жатыптыр. Андан сырткары Ибраимовду саат 13:30 чамаларында кармап кетишкен болсо, саат 13:00дөн 14:30га чейин телефон байланыш таптакыр жок болуп жатты. Эл тосуп чыкпасын деп атайын байланышты үзгүлтүккө учуратышты.

Албек Ибраимов иштеп жүргөндө ичип-жеп койгондур, бирок аны мындай жол менен кармап кетиши туура эмес да. Күнөөсү барбы, коркутуп үркүтпөй эле акырын алып кетсе болот эле го. Мисалы, азыр балдардын сабалганы боюнча бизде далил да жок болуп калды. Себеби видеотасмага түшүп калган жазуулардын баарын алып кетишиптир", - деди Алкыштиев.

Албек Ибраимовду кармап кеткен үйгө барганыбызда Бактыбек аттуу күзөтчү УКМКнын кызматкеринин Ибраимовду кармап кеткенин көргөнүн айтып, бирок жогорудагы айтылган окуялар боюнча маалымат берүүдөн баш тартты.

Айыл тургундарынын айтымында, Албек Ибраимов учурда жашап жаткан үйдүн аянты жалпы 33 гектарды түзөт. Сабырбек Алкыштиевдин билдиришинче, бул үй Албек Ибраимовго чоң атасынан калган.

"Албек ушул жерде төрөлүп, ушул жерде өстү. Азыр үйүнүн аянты 33 гектар. Бирок бул жерлерди Албек Ибраимовго эл өзү саткан. "Акча керек, алып койчу" деп эшигин каккылап отуруп сатышкан. Бул бала жалаң гана насыя алып сатып алчу. Мыйзамсыз жол менен тартып алган жок. Эл өзү сатып жатса, анда эмне күнөө бар", - деди Алкыштиев.

Албек Ибраимовдун кармалышына айыл тургундары нааразы болуп, айылдагы маданият үйүнө чогулушуп, коргоо комитетин түзүштү. Ага жалпы 10 адам кирип, алар тергөө калыс, сот адилет чечим чыгаруусун талап кылып президент Сооронбай Жээнбековго кайрылмакчы болушту.

Эске салсак, Албек Ибраимовго "Дастан" ишканасын жетектеп турган учурда болгон сатып алуулар боюнча кылмыш иши козголгон. Ал 19-июлда Улуттук коопсуздук боюнча мамлекеттик комитетинин кызматкерлери тарабынын кармалган. Ушул эле күнү Бишкектин Биринчи Май райондук соту анын баш коргоо чарасын карап, 29-августка чейин тергөө абагында калтырды.

13-июлда Бишкек шаардык кеңешинин депутаттары Ибраимовго ишеним көрсөтпөө чечимин кабыл алып, токтомду премьер-министрге жөнөтүшкөн. Тийиштүү токтомго премьер-министр 19-июлда кол койгон.