УКМК: "Албек Ибраимовдун сөзү" деп тараган аудио боюнча чара көрүлөт"

УКМК Бишкек шаарынын экс-мэри "Албек Ибраимовдун сөзү" деп интернетке тараган аудио боюнча чара көрөт. Бул тууралуу бүгүн, 23-июлда SUPER.KG'ге УКМКнын басма сөз кызматынан кабарлашты.

"Биздин ал аудиого тиешебиз жок, биз тараткан эмеспиз. Тараган аудио боюнча чара көрүлүп, иликтенет", - деп билдирди басма сөз кызматы.

Бишкектин мурдагы мэри Албек Ибраимов УКМК тарабынан камакка алынгандан кийин, 21-июлда интернетте Ибраимовдун сүйлөгөн сөзү делген аудио тараган. Ал видеодон экс-мэрдин үнүнө окшогон адамдын каршылык көрсөтөрүн айтып жатканын угууга болот.

"Коррупция үчүн 20 жыл отурганга караганда киши өлтүрүүгө аз мөөнөт аласың. Мен өзүм тээтиги "вышканын" үстүнө снайперди коюп коём", - деп айтылат аудиодо. Аудио жаздыруудагы үндүн Албек Ибраимовго тийиштүү экендиги боюнча маалымат тастыктала элек.

Эске салсак, Албек Ибраимовго "Дастан" ишканасын жетектеп турган учурда болгон сатып алуулар боюнча кылмыш иши козголгон. 19-июлда Албек Ибраимов Улуттук коопсуздук боюнча мамлекеттик комитети тарабынын кармалып, Биринчи Май райондук соту тергөө аяктаганга, тагыраагы, 29-августка чейин камакта калтырган.

13-июлда Бишкек шаардык кеңешинин депутаттары Ибраимовго ишеним көрсөтпөө чечимин кабыл алып, токтомду премьер-министрге жөнөтүшкөн. Премьер-министр тийиштүү токтомго кол койгон.