Чүйдө эсин жоготуп жолдо калган жаранды милиция кызматкерлери сактап калышты

Чүй ОИИББинин көчмө кабылдамасы эсин жоготуп жолдо калган жаранды сактап калды. Бул туралуу бүгүн, 23-июлда аталган башкармалыктан кабарлашты.

Маалыматка ылайык, 21-июль күнү Бишкек-Торугарт унаа жолунда Чүй ОИИББинин көчмө кабылдамасы жол карта боюнча айланма жол менен чыгышты көздөй бара жаткан. Кызматкерлер Хонда Стрим үлгүсүндөгү автоунаа токтоп, жанында аял киши өтүп жаткан унааларды токтотууга аракет кылып жатканын көрүшүп, жанына барышкан.

"Токтоп турган унаада жолдошу өзүн жаман сезип, эсин жоготуп жатканын айткан аял аны тез арада оорукана жеткирүү керектигин билдирген. Милиция кызматкерлери алгачкы медициналык жардам көрсөтүшүп, "Тез жардам" кызматына телефон чалышкан. Бирок "Тез жардам" кызматы ал жерге жеткенге чейин бир топ убакыт талап кылынгандыктан, бейтапты жана аялын көчмө кабылдама унаага салып, кызматкерлердин бири алардын автоунаасын айдап Ысык-Ата районундагы аймактык ооруканага жеткиришкен. Ооруканада дарыгерлер бейтапка дароо медициналык жардам көрсөтүшүп, эсине келтиришкен. Ал Бишкек шаарынын 41 жаштагы тургуну Жеӊишбек Солтоев экендиги маалым болду. Анын бөйрөгүндө таш бар болгон, ал ошонун таасиринде эсин жоготуптур", - деди маалымат катчы.

Күтүүсүздөн эсин жоготуп жолдо калган учурда жардамга келген милиция кызматкерлерине Жеӊишбек Солтоев ыраазычылыгын билдирип, өз кесибин сүйүп иштеген милиция кызматкерлери бар экенине кубанганын жашырган эмес.

Эске сала кетсек, көчмө кабылдамалар жарандардан түшкөн арыз-даттанууларды кабыл алып, аларды ыкчам түрдө чечүүнү колго алып, жардам сурагандарга кеп-кеңештерди берүүнү жүзөгө ашырышат. Бул кабыл алуучу көчмө пункттар 2018-жылдын 5-июлунан тарта ишке киришкен.