Бишкекте 1 миң 400 доллар уурдап, ага 2 телефон жана зер буюмдарды сатып алган 25 жаштагы айым кармалды

Бишкек шаарындагы "Дордой" базарында 1 миң 400 доллар (95 миң 522 сом) уурдап алган 25 жаштагы айым кармалды. Бул тууралуу Бишкек шаарынын ички иштер башкармалыгы билдирди.

Маалыматка ылайык, 2018-жылдын июль айында милицияга Бишкек шаарынын тургуну арыз менен кайрылган. Ал "Дордой" базарынан 1 миң 400 доллар салынган сумкасын уурдап кетишкенин айткан. Иликтөө иштеринин натыйжасында аталган кылмышка шектүү катары К.К. аттуу 25 жаштагы айым кармалган. Шектүүнүн айтымында, ал уурдап алган акчага 2 Редми үлгүсүндөгү телефон жана алтын зер буюмдарды сатып алган. Ал эми пайдалана элек 500 доллар (34 миң 113 сом) жана 5 миң сом жабырлануучуга кайтарылып берилген.

Соттун чечими менен кылмышка шектүү К.К. 2 айга убактылуу кармоочу жайга камакка алынып, тергөө иштери уланууда.