"ЭЛДИК КАБАРга" жооп: "Мыйзам боюнча жоголгон айдоочулук күбөлүк 2 айдан соң берилет" дейт айдоочулук курамды каттоо жана сыноо пунктунун башчысы

Мыйзам боюнча жоголгон айдоочулук күбөлүк 2 айдан соң берилет. Мындай маалыматты SUPER.KG порталына Өзгөн шаардык РЭОсунан билдиришти.

Эске салсак, окурман "Элдик кабар" рубрикасына "Жоготуп жиберген айдоочулук күбөлүгүмдү кайра алайын деп документтерди топтоп барсам, эки ай күт деп жатышат", - деген билдирүүсүн жөнөткөн.

Бул кабарга жооп алуу максатында Өзгөн регионалдык транспорт жана айдоочулук курамды каттоо жана сыноо пунктуна кайрылганыбызда, төмөндөгүдөй жооп алдык:

"Кыргыз Республикасынын өкмөтүнүн 2017-жылдын 18-декабрындагы 819-токтомунун 43 жана 46-пункттарына ылайык, айдоочулук күбөлүк жоголгон учурда:

1. Паспорт

2. Айдоочунун өздүк карточкасы;

3. Медициналык маалым кат (Форма 83);

4. Жол кыймылынын коопсуздугу мамлекеттик органдын автотранспорт каражаттарынын башкаруу укугунан ажыратылбагандыгы жөнүндөгү маалым каты керектелет.

Аталган документтерди алып келген учурда айдоочуга 2 айга убактылуу күбөлүк жазылып берилет. 2 ай аралыгында күбөлүк табылып калышы мүмкүн. Эгерде табылбаса, жаран эч кандай көйгөйсүз айдоочулук күбөлүк ала алат", - деп билдирди Өзгөн регионалдык транспорт жана айдоочулук курамды каттоо жана сыноо пунктунун башчысы Айбек Мадаминов.