Чек ара кызматы: "Өлкөнүн коопсуздугу үчүн чек арага кошумча блокпосттор коюлду"

Өлкөнүн коопсуздугун сактоо, терроризм жана баңгизат сатууга каршы күрөшүү максатында чек арага кошумча блокпосттор коюлду. Бул тууралуу Чек ара кызматынын маалымат катчысы Гулмира Бөрүбаева SUPER.KG порталына билдирди.

Маалыматка караганда, жыл башынан бери чек араны бузуу боюнча 96 факты катталган. Мындан сырткары Сириядагы куралдуу кагылыштарга катышып келе жаткан 12 адам кармалган.

"Соңку учурда Ооганстан жана Сириянын аймагындагы террордук топтордун Борбор Азиянын чек арасына жакындап жатканы белгилүү. Алар биздин өлкөгө да таасир бериши мүмкүн. Ошон үчүн ар кандай террордук топтордун бастырып кирүүсүн алдын алуу үчүн кошумча посттор орнотулду. Чек ара кызматы Башкы штабдын карамагындагы башка аскердик бөлүктөр менен биргеликте чалгындоо иштерин өткөрүүдө", - деди маалымат катчы.

Ошондой эле жыл башынан бери чек арага байланыштуу 8 чыр-чатак катталганын кошумчалады. Анын бешөө Кыргыз-Тажик чек арасында, үчөө Кыргыз-Өзбек чек арасында болгон.