Казакстанда 12 жаштагы кыздын ашказанынан 3 килограммдан ашуун чач алынды

Казакстанда 12 жаштагы кыздын ашказанынан 3 килограммдан ашуун чач алынды. Бул тууралуу чет элдик басылмалар жазып чыкты.

Белгилүү болгондой, кызга Мангистау облусундагы балдар ооруканасында операция жасалган. Оорукананын хирургия бөлүмүнүн башчысы Султанбек Тумашевдин айтымында, чач топтоло берип кыздын ашказанын ээлеп калган. Жадакалса ашказанда тамак үчүн дагы орун калган эмес. "Операция жасап жаткан учурда кыздын ашказанынан салмагы 3 килограмм 560 грамм болгон чачтын топтомун алып чыктык. Чачтын топтолушу ичке ичегиден башталган", - деп билдирген хирург.

Ал эми бейтаптын апасы кызы бир нече жылдан бери эле чачтарынын учунан тиштеп, жутуп жүрө бергендигин айткан. Акыркы 2-3 жылда кызынын тамакка болгон табити жоголуп, көп окшуп, арыктап калган. Бирок эмнегедир анын курсагы чоңоюп кеткенин айтып дарыгерлерге кайрылган. Медициналык кароодон кийин дарыгерлер кыздын ашказанына чач топтолуп калганын аныкташкан. Учурда кыздын абалы канааттандырарлык болуп, ал үйүнө чыгарылган.