Мискенбаев: "Биз бир жыл мурун Данияр Үсөнов Даниил Урицкий деп атын өзгөртүп алганын айтып чыкканбыз"

"Биз "Айкөл Ала-Тоо" коомдук бирикмеси бир жул мурун Данияр Үсөновдун атын өзгөртүп алганы боюнча айтып чыгып, тиешелүү жактарга кат жазганбыз", - деп бүгүн, 30-июлда SUPER.KG порталына Жогорку Кеңештин мурдагы депутаты Мээрбек Мискенбаев билдирди.

Анын айтымында, аталган бирикме былтыр 14-декабрда Беларустун Кыргыз Республикасындагы элчилигинин алдына нааразычылык акциясына чыгышкан.

“Биз бир жыл мурун эле Данияр Үсөновдун Даниил Урицкий болуп атын өзгөртүп алганын интернет булактарынан окуганбыз. Анан Башкы прокуратурага, Тышкы иштер министрлигине кат жазганбыз. Бирок алардан "каралып жатат" дегенден башка алгылыктуу жооп келген эмес. Ошондой эле Беларустун президенти Александр Лукашенконун өзүнүн атына да кат жазганбыз. Биздин кайрылуубуз тууралуу көп эле маалымат булактары жазышкан. Керек болсо бизде Жаныш Бакиев дагы атын өзгөртүп алганы тууралуу маалымат бар", - деди Мискенбаев.

Эске салсак, 27-июль күнү Беларустун жалпыга маалымдоо каражаттары Кыргыз өлкөсүнүн мурдагы премьер-министри, издөөдө жүргөн Данияр Үсөнов тууралуу маалымат жана анын сүрөтүн жарыялаган. Анын учурда "Беларусь улуттук биотехнология корпорациясы" ЖАКсын жетектей тургандыгы, Данияр Үсөнов өзүн Даниил Урицкий деп тааныштыргандыгы интернет колдонуучулары тарабынан кызуу талкууланууда.