Бишкектин экс-мэри Албек Ибраимовдун апасы: "Баламдын күнөөсү жок. Ал жаман иш кылган эмес"

"Баламдын күнөөсү жок, ал жаман иш кылган эмес" деп бүгүн, 30-июлда SUPER.KG порталына Бишкектин экс-мэри Албек Ибраимовдун апасы билдирди.

Ибраимовдун апасынын айтымында, ага коюлган айып чындыкка дал келбейт.

"Балама жок жерден эле айып коюп жатышат. Мен аны камалмак түгүл милиция кармабайт деп ойлочумун. Биздин үнүбүздү эч ким укпай жатат. Баламдын ак экенине ишенем", - деди Ибраимовдун апасы.

Бүгүн Бишкек шаардык соту мурдагы мэр Албек Ибраимовду камакта калтыруу чечимин күчүндө калтырды.

19-июлда Биринчи Май райондук соту Ибраимовду тергөө аяктаганга чейин УКМКнын тергөө абагында калтыруу чечимин кабыл алган. Анын жактоочулары баш коргоо чарасын өзгөртүп, үй камагына чыгарууну өтүнүп шаардык сотко кайрылган.

Эске салсак, Албек Ибраимовго "Дастан" ишканасын жетектеп турган учурда болгон сатып алуулар боюнча кылмыш иши козголгон. 19-июлда Албек Ибраимов Улуттук коопсуздук боюнча мамлекеттик комитети тарабынан кармалып, Биринчи Май райондук соту тергөө аяктаганга, тагыраагы, 29-августка чейин камакта калтырган.

13-июлда Бишкек шаардык кеңешинин депутаттары Ибраимовго ишеним көрсөтпөө чечимин кабыл алып, токтомду премьер-министрге жөнөтүшкөн. Премьер-министр тийиштүү токтомго кол койгон.