Москвада 3 эже-сиңди көп жылдан бери кордук көрсөтүп келген атасын өлтүрүп коюшту

Орусиянын Москва шаарындагы көп кабаттуу үйлөрдүн бириндеги батирден киши колдуу болуп каза болгон 57 жаштагы кишинин жансыз денеси табылды. Иликтөө иштеринин жүрүшүндө шектүү катары анын 3 кызы кармалганын орусиялык ЖМКлар жазууда. Андагы маалыматтарга таянсак, үч кыз өз кылмыштарын моюнуна алышты.

"Кармалган 17, 18, жана 19 жаштагы бир тууган эже-сиңдилер кылган кылмыштарын моюнуна алышты. Алар мындай ишке атасынын көп жылдан бери кордук көрсөтүп, ур-токмокко алып келгени себеп болгонун жүйө келтиришкен. Эже-сиңдилер бул кылмышка алдын ала даярданышкан соң барышкан. Алар атасы уктап жаткан учурда ага бир нече жолу бычак менен сайгылашкан. Алган жараатынан улам ал ошол жерде каза болгон", - деп жазышууда ЖМКлар.

Ал эми тергөө учурунда каза болгон Орусия жараны көп убакыттан бери баңгизатын колдонуп жүргөндүгү белгилүү болгон. Ал 3 кыз жана бир уулду тарбиялап келген болсо, 20 жаштагы уулу бир нече жылдан бери өзүнчө жашап келген. Ошондой эле алар жашаган үйдөн бир нече аңчылык кылуучу жана пневматикалык курал-жарактар, ок-дарылар, унаасынан 2 килограмм баңгизат табылган.