Бишкекте Ленин райондук сотунун имаратында жоокер өзүн-өзү атып алды

Бишкек шаарындагы Ленин райондук сотунун имаратында Жаза аткаруу мамлекеттик кызматынын алдындагы Кайтаруу жана күзөтүү департаментинин жоокери өзүн-өзү атып алды. Бул тууралуу SUPER.KG порталына ЖАМКнын басма сөз кызматы билдирди.

"Бүгүн, 31-июлда болжол менен саат 15:40 чамасында 19 жаштагы Ж.И. аттуу Кайтаруу жана күзөтүү департаментинин жоокери кызмат учурунда күзөттө турган жеринен өзүн-өзү атып алды. Ал дааратканага кирип, Макаров үлгүсүндөгү тапанча менен өзүн башына аткан. Жоокер алган жаракатынан ошол жерде каза болду. Учурда атайын иликтөөчү топ жана Аскердик прокуратура тарабынан бул окуя териштирилүүдө", - деди басма сөз катчы.

Каза болгон жоокер 2018-жылы Биринчи Май райондук аскер комиссариаты тарабынан кызмат өтөөгө чакырылган.

Буга чейин Молдовановка айылында жайгашкан №1-түзөтүү абагын кайтарган 21 жаштагы жоокер өзүн-өзү атып алган. Ага Чүй облустук ооруканасынан операция жасалып эсине келген.