Адис: "Балдарга 6 айга чейин эмчек эмизүү ымыркайлардын өлүмүн 25 пайыздан 40 пайызга чейин азайтат"

Балдарга 6 айга чейин эмчек эмизүү ымыркайлардын өлүмүн 25 пайыздан 40 пайызга чейин азайтат. Бул тууралуу бүгүн, 1-августта Эне жана баланы коргоо улуттук борборунун жетекчиси Камчыбек Узакбаев маалымат жыйынында билдирди.

"Дүйнөлүк изилдөөлөрдүн натыйжасында адистер жаңы төрөлгөн ымыркайларды эне сүтү менен багуу наристелердин өлүмүн 40 пайызга чейин азайтат. Ымыркайлардын сырткы чөйрөгө туруштук беришинде жана дени сак чоңоюшунда эне сүтүнүн ролу абдан чоң", - деди Узакбаев.

Бүткүл дүйнөлүк эмчек эмизүү жумалыгы дүйнөнүн 170 өлкөсүндө 1-7-август аралыгында эмчек эмизүүнү стимулдаштыруу жана балдардын ден соолугун жакшыртуу үчүн өткөрүлөт. Биринчи жолу эмчек эмизүү жумалыгы 1991-жылы алгачкы 6 айга чейин жалаң гана эмчек эмизүүнү колдоо жана коргоо үчүн өткөрүлгөн.