Өмүрбек Текебаев Улуттук кардиология борборуна медициналык кароодон өтүү үчүн чыгарылды

Мурдагы депутат Өмүрбек Текебаев Улуттук кардиология бөлүмүндө медициналык кароодон өтүп жатат. Бул тууралуу бүгүн, 1-августта Жаза аткаруу мамлекеттик кызматынын маалымат катчысы SUPER.KG порталына кабарлап, Текебаев медициналык кароого кечээ чыгарылганын белгиледи.

Маалыматка ылайык, экс-депутат №47-түзөтүү абагынын дарыгерлеринин көрсөтмөсү менен Улуттук кардиология борборуна жөнөтүлгөн.

"Буга чейин депутаттык комиссия Өмүрбек Текебаевдин дарыланууга муктаж болуп жатканын жазган. Абактагы дарыгерлер текшерип көрүп, консилиумдан кийин конвойлордун коштоосунда ал кардиологиялык борборго жеткирилди. Кечээтен баштап медициналык кароодон өтүп жатат, анын жыйынтыгынын негизинде дарылануу шарттары белгилүү болот", - деди маалымат катчы.

Эске салсак, былтыр жаз мезгилинде Өмүрбек Текебаев менен мурунку элчи Дүйшөнкул Чотоновго "Мегакомду" сатууга көмөктөшүү үчүн орусиялык ишкерден пара алган" деген жүйө менен кылмыш иши козголгон. 2017-жылы 16-августта Бишкек шаарынын Биринчи Май райондук соту Текебаев менен Чотоновду ар бирин 8 жылга эркинен ажыраткан. 2-октябрда Бишкек шаардык соту, 21-ноябрда Жогорку Сот райондук соттун өкүмүн күчүндө калтырган.