"Өмүрбек Текебаевдин ден соолугу жакшы эмес. Аны үй-бүлөсү менен жолуктурбай жатышат" дейт жактоочусу

"Өмүрбек Текебаевдин ден соолугуна жетиштүү көңүл бурулбай жатат", - деп билдирди SUPER.KG порталына жактоочу Таалайгүл Токтакунова.

Анын айтымында, Өмүрбек Текебаев камакка алынганга чейин эле ооруп жүргөн.

"Өмүрбек Текебаевдин саламаттыгы жакшы эмес. Ал камакка алынганга чейин да ооруканада дарыланып жаткан болчу. Ооруканадан убактылуу чыгып эле Европага учуп, кайтып келгенде камакка алынып калды. Ошондон бери ден соолугуна жакшы кам көрүлбөй жатат. Ал жаткан абакта медициналык кароону жакшы жүргүзүшпөйт. Текебаев азыр Улуттук кардиология борборунда дарыгерлердин текшерүүсүнөн өтүп жатат. Текшерүү аягына чыга элек. Бул жерден чыгып, кайра эле абакка кетет. Режим өзгөртүлгөн жок. Жактоочулар ага жолугуп чыктык. Үй-бүлө мүчөлөрүн экс-депутатка киргизбей жатышат", - деди Токтакунова.

Буга чейин Өмүрбек Текебаев медициналык кароодон өтүү үчүн Улуттук кардиология борборуна чыгарылганы маалымдалган.

Эске салсак, былтыр жаз мезгилинде Өмүрбек Текебаев менен мурунку элчи Дүйшөнкул Чотоновго "Мегакомду" сатууга көмөктөшүү үчүн орусиялык ишкерден пара алган" деген жүйө менен кылмыш иши козголгон. 2017-жылы 16-августта Бишкек шаарынын Биринчи Май райондук соту Текебаев менен Чотоновду ар бирин 8 жылга эркинен ажыраткан. 2-октябрда Бишкек шаардык соту, 21-ноябрда Жогорку Сот райондук соттун өкүмүн күчүндө калтырган.