Коррупциялык иштерден өндүрүлгөн каражаттар үчүн ачылган эсепке 200 миллион сомдон ашык каражат түштү

2018-жылдын 3-июлунан 31-июлуна чейин коррупциялык иштерден өндүрүлгөн каражаттар үчүн ачылган атайын эсепке 234 миллион сомдон ашык каражат түштү. Бул тууралуу Каржы министрлиги тараткан маалыматта айтылат.

Маалыматка караганда, экономикалык жана кызматтык кылмыштар жөнүндөгү кылмыш иштери боюнча мамлекетке келтирилген зыяндын ордун толтуруудан түшкөн акча каражаттарын эсепке алуу жана топтоштуруу үчүн бирдиктүү депозиттик эсеп ачылгандан бери, башкача айтканда, 2018-жылдын 3-июлунан 31-июлуна чейин аталган эсепке жалпысынан 234 млн 834 миң 377 сом түшкөн.

Бул сумманын 63 миллиондон ашыгын Экономикалык кылмыштар менен күрөшүү боюнча мамлекеттик кызматы төккөн. 111 миллион 611 миң 621 сомду Улуттук коопсуздук мамлекеттик комитети, 59 миллион 326 миң 897 сом каражатты Башкы прокуратура төккөн. Ал эми 533 миң 100 сом Ички иштер министрлиги тарабынан которулган.