Жактоочулар менен нотариустар мамлекетке салык төлөй турган мыйзам сунушталууда

Кечээ, 1-августта Юстиция министрлиги нотариустар жана жактоочуларды салык төлөөгө милдеттендирген мыйзам долбоорун коомдук талкууга алып чыкты. Аталган министрликтин маалымат катчысы Айзада Кадырованын SUPER.KGꞌге билдиргенине караганда, аталган долбоор коомдук талкуудан кийин сунуш-пикирлерге карап өзгөртүлүшү мүмкүн.

"Биз бул боюнча кенен маалымат бере албайбыз. Анткени коомдук талкуудан кийин дагы бир нече өзгөртүүлөр киргизилиши мүмкүн. Кыскача айтсак, мыйзам долбоору "Жактоочулук жана нотариалдык ишмердүүлүк боюнча айрым актыларга өзгөртүү киргизүү жөнүндө" деп аталат. Мыйзам долбоордун негизги максаты жактоочулар менен нотариустардын ишмердигин салык режимине киргизүү жана бул тармакты иретке келтирүү болуп саналат. Себеби алардын жумушу ишкердиктин түрүнө кирип жаткандыктан, салык алуу маселеси сунушталып жатат", - деди Кадырова.

Сунушталып жаткан мыйзам долбоорунда жактоочулар менен нотариустардын ар бир кызмат көрсөтүүсүндөгү кирешесинин 10 пайызы салык катары өлкө казынасына чегерилиши жазылган.