Орусияда корей кызын куткарам деп өзү сууга чөгүп каза болгон 17 жаштагы кыргыз жигиттин сөөгү жерге берилди

Орусияда 29-июлда сууга чөгүп каза болгон 17 жаштагы Жандарбек Кубанычбек уулунун сөөгү бүгүн, 2-августта өзү туулуп өскөн Кара-Кулжа районунун Октябрь айылында жерге берилди. Бул тууралуу SUPER.KG'ге өзүн Жаныш деп тааныштырган агасы кабарлады. Анын айтымында, баланын каза болгонун ата-энесине 1-август күнү түштөн кийин гана угузулуп, бүгүн жаназасы окулду.

"Баланын сөөгү айылга кечээ түштөн кийин алынып келди. Табытты ачпай туруп эле ошол бойдон боз үйгө киргизип, ата-энесине угуздук. Ата-энеси жайлоодо болчу, кечинде келишкен. Бүгүн жаназасын окуп, маркумду жерге бердик", - деди агасы.

Белгилей кетсек, Жандарбек Кубанычбек уулу 29-июль күнү Орусиянын Сахалин облусунда жайгашкан Русское деп аталган көлгө чөгүп каза болгон. Сахалиндеги кыргыздардын "Биримдик" диаспорасынын маалыматына караганда, бала көлгө чөгүп бараткан корей улутундагы кызды куткарууга аракет кылып жатып чөгүп кеткен.