Оштогу "Төлөйкөн" ат майданын оңдоп-түзөө үчүн 5 миллион сомдук долбоор сунушталды

Ош облусундагы "Төлөйкөн" ат майданынын жаңы директору Талган Арзибаев ат майданды оңдоп-түзөө боюнча долбоор сунуштады. Долбоордун баасы 5 миллион сомду түзөт. Бул тууралуу Жаштар иштери, дене тарбия жана спорт агенттиги билдирди.

"Жай айларында ат майданда жарыш жолдор тазаланып, малды сугаруу үчүн 120 чарчы метр көлмө салынып, бак-дарактарды сугарууга лотоктор оңдолду. Тоют кампаны оңдоп-түзөө, көрүүчү орундары жаңылоо боюнча жана башка иштер жүргүзүлдү. Аткарылган иштердин баасы 117 миң сомду түздү", - деп жазылат маалыматта.

Директордун айтымында, учурда ат майдандагы көк бөрү талаасын оңдоп, тай казан сатып алуу зарылчылыгы турат. Ошондой эле административдик имаратты оңдоо жана башка иштерди аткаруу керек. Бул иштерди аткарууга 5 миллион сом керек болуп жатат.

Ошондой эле Арзибаевдин айтымында, ат майдандын кирүү бөлүгүн, оюн талаасын жана курулмаларды оңдоого жаңы долбоор даярдалган. Бул оңдоо иштери аткарылган соң "Төлөйкөн" ат майданында республикалык жана эл аралык мелдештерди өткөрүүгө мүмкүнчүлүк түзүлөт.