Супер-Инфо
super.kg видео
Президент Сооронбай Жээнбеков электр тармагына алынып жаткан 4 миллион евролук насыялык келишимдин ратификациясына кол койду
Кыргыз өлкөсү электр тармагын жакшыртуу үчүн 4 миллион евро насыя алат. Аталган насыялык макулдашууну ратификациялоо боюнча мыйзамга өлкө башчы Сооронбай Жээнбеков кол койгонун президенттик аппараттын басма сөз кызматынан таратышты.
Маалыматка караганда, Европа реконструкциялоо жана өнүктүрүү банкы өлкөдөгү электр тармагын жакшыртуу үчүн 6 миллион евро каражат бөлүүдө. Анын 2 миллион евросу грант түрүндө болсо, 4 миллион евро насыя катары алынууда.
Аталган каражат "Чыгыш электр“ ачык акционердик коомун реабилитациялоо долбоору үчүн иштетилет. Мыйзам Жогорку Кеңеш тарабынан 2018-жылдын 28-июнунда кабыл алынган.
"Чыгыш электр" ААКсы бөлүштүрүүдө 20 пайызга чейин жеткен өтө көп жоготууларды кошкондо төмөн эксплуатациялык мүнөздөмөгө ээ, ошондой эле эски жабдуунун иштөөсүнүн техникалык мөөнөтү аяктагандан кийин да иштешине байланыштуу үзгүлтүктөр көп. Зымдарынын көбү 1960-1970-жылдары аз чыңалууга ылайыкталып орнотулуп, учурдун талаптарына жооп бербейт.
Ошол себептен 2017-жылдын 7-декабрында Кыргыз Республикасынын жана Европа реконструкциялоо жана өнүктүрүү банкынын ортосунда "Чыгыш электр" ААКсын жаңыртуу долбоору үчүн кредиттик жана гранттык макулдашууларга кол коюлган", - деп айтылат маалыматта.
Мыйзам расмий жарыяланган күндөн тартып он күн өткөндөн кийин күчүнө кирет.
Эске салсак, буга чейин бир топ депутаттар алынып жаткан насыяга нааразычылыгын билдирип, электр тармагындагы коррупциялык систем боюнча сындарды айтышкан. Эл өкүлдөрү бул тармакка алынган насыялар натыйжасыз коротулуп жатат деген пикирде. Бирок алар аталган насыялык келишимди 3 окууда тең колдоп беришкен.
1
1 |