Ооганстандагы мечиттердин биринде жардыруу болуп 30 адам каза болду

Кечээ, 3-августта Ооганстандын чыгышында жайгашкан Гардез шаарындагы мечитте жардыруу болуп, 30 адам каза болду. Мындай маалыматты чет элдик басылмалар жергиликтүү маалымат булактарына шилтеме берүү менен жазып чыгышты.

Маалыматка караганда, каза болгондордон сырткары дагы 100гө жакын адам ар кандай жаракаттарды алышкан. Полициянын кабарлашынча чабуул адамдар жума намазга чогулган убакта жасалган. Анда аял кийимин кийген эки жанкечти адегенде адамдарга карата ок чыгарып, андан кийин өздөрүн жардырып салышканы айтылат. Азыркы убакта жардырууну эч бир террордук топ моюнуна ала элек.

Ал эми “Талибан” террордук кыймылынан бул чабуулга эч кандай катыштыгы жок экенин билдиришкен. Алдына ала маалыматтар боюнча жардыруу болгон мечитте 300гө жакын адам болгон.