Жоомарт Оторбаев Польшанын вице-премьер-министри менен жолугушту

Биринчи-вице-премьер-министр Жоомарт Оторбаев экономикалык кызматташтык жана өнүгүү уюмунун (ЭКӨУ) Варшава шаарында өткөн конференциясынын алкагында Польшанын вице-премьер-министри Януш Пехочиньский менен жолугушту. Бул тууралуу өкмөттүн басма сөз кызматы бүгүн, 28-июнда билдирди. Жолугушууда Жоомарт Оторбаев Польшанын  инвестиция чөйрөсүндө Кыргызстандын жигердүү өнөктөшү болуп калышы үчүн бардык шарттар бар экендигин белгиледи. Ошондой эле биринчи-вице-премьер-министр Кыргызстан Польшанын динамикалуу өнүгүп жаткан Кытай рыногуна чыгышы үчүн көпүрө болуп бере аларын айтты. Ага жооп кылып, Януш Пехочиньский кесиптешинин пикирин колдоду жана айыл чарба азык-түлүктөрүн кайра иштетүү, туризм тармактарын, муниципалдык кызмат көрсөтүү чөйрөсүндө мамлекеттик жеке менчик кызматташтыкты өнүктүрүүнү, ошондой эле экологиялык таза азык-түлүктөрдү өндүрүүнү жана эки тараптуу мамилелерди өнүктүрүү ишин келечектүү багыттар катары белгиледи.