Азиз Суракматовдун Бишкектин мэри болуусуна каршы кол чогултулуп, атайын жасалган "каракчылар" өрттөлөт

Жарандык активисттер Азиз Суракматовдун Бишкек шаарынын мэри болуусуна татыксыз экенин айтышууда. Мындан улам алар бүгүн, 6-август күнү нааразычылык акциясын уюштурууда.

Активисттер КСДП партиясы буга чейин Бишкек шаарынын мэрлигине алып келген Иса Өмүркулов, Кубанычбек Кулматов, Албек Ибраимовго кылмыш иши козголгонун, бүгүн дагы бир талапкерин сунуштап жатканын белгилешти. Акцияга атайын жасалган "каракчыларды" алып келишти.

"Биз каршылык билдирип "каракчыларды" өрттөмөкпүз, бирок Бишкек шаардык кеңешинин депутаттарына элдин үнүн угууга мүмкүнчүлүк берип жатабыз. Өрттөө деген кыргызда жаман белги, үмүттүн өлгөнүн билдирет. Азиз Суракматовду бир ууч эле адам мэрликке алып келип жатканы туура эмес. Биринчиден, Суракматовдун талапкерлигин алып келүүдө Тил комиссиясы кыргыз тилин мазактоого жол берди. Экинчиден, шаардык кеңештин төрагасы менен депутаттарынын кесиптик жоопкерчилиги, уяты деген чоң маселе турат. Биз Суракматовдун Бишкек мэрлигине келишине каршы кол чогултабыз", - деди уюштуруучулардын бири журналист Канышай Мамыркулова.

Азиз Суракматов - Бишкек мэрлигине жалгыз талапкер. Борбордук шайлоо комиссиясы мэрди шайлоону 8-августка белгилеген.