Атамбаев жана Жээнбековдун кыздарынын үлпөт тойлору кызуу талкууга алынууда

Кечээ эле коомчулук президент Сооронбай Жээнбековдун эс алуу учурунда Ысык-Көлдүн жээгинде түшкөн сүрөттөрүн кызуу талкууга алган.

Эми минтип интернет айдыңында президент Сооронбай Жээнбековдун кызы Бактыгүл жана анын жолдошу Атабектин 2 жыл мурун болгон үлпөт тоюнда тартылган видео кеңири тарап кызуу талкууга алынууда. Интернет колдонуучулар өлкө башчынын кызынын тоюн мурдагы президенттин кызынын тоюна салыштырып ар кандай ойлорун жазышууда. Президенттин күйөө баласы Жогорку Кеңештин депутаты Алиярбек Абжалиевдин уулу экени белгилүү. Үйлөнүү той 2016-жылы өткөн. Учурда жубайлардын Алиаскар аттуу уулу бар. Жакында эле өлкө башчысынын жээн небересинин тушоо кесүү тою өткөн. Анда президент тойго келген эмес, ал эми ханайым небересине ак батасын берип, сыйлуу конок болуп кеткени маалым болгон.

Ошол эле 2016-жылдын август айында өлкөнүн ошол кездеги президенти Алмазбек Атамбаевдин кызы, сүрөтчү Алия Шагиева Константин Рязановго турмушка чыкканы белгилүү болгон. Эки жаштын үлпөт тою көптөгөн кызуу талкуууларды жараткан, анда элдин көңүлүн президенттин күйөө баласы катардагы эле программист экени бурган. Бул тууралуу Шагиева да өзүнүн социалдык тармактагы баракчасына жазып чыккан. Ошондой эле ал эч кандай үлпөт той өткөрбөгөнүн жөн гана Бакыт үйүнө барып никеге турганын жана жакын достору менен чакан майрам өткөргөнүн жазган. Интернетке тараган видеодо Алия Шагиеванын ак түстөгү жөнөкөй көйнөк менен көрүүгө болот. Азыркы тапта түйгөлөр Таир аттуу баланы тарбиялап жаткан маалы. Ошондой эле Алия Шагиева 2-наристесин күтүп жатканын да жакында жарыялаган.