Дагы бир журналисттин өмүрү коркунучтабы?

"Тынчтык Алтымышевди катуу сабап, тилин тибирегис кылып койгула" деген буйрук түшүптүр, "караларга", - деп жазды журналист Алтымышев өзү интернеттеги баракчасына.

Бүгүн, 6-августта жазган билдирүүсүндө ал өзүнө абайлап жүрүүсү керектигин эскерткендер болгонун белгилеген.

"Каралардын деле арасында акыйкаттыкты, чындыкты, жигиттикти сүйгөндөр бар да, азырынча буйрукчуну айтпаса да, сагыраак болуумду салам дубай кылышыптыр. Аларга рахмат!
Эми Кудайдан башка мени эч ким коргой албайт, аны так билем. Ошол эле маалда акыркы кездердеги журналисттик, блоггердик ишмердигиме анализ жасап, тажрыйбалуу чекист, оперлер менен кеңешүүдөн кийин шамал кайдан согуп жатканын боолголодук. Эми айрым аккаунт, телефондордун ээликтерин ачсак, баары белгилүү болот.

Качкан да Кудай дейт, кууган да Кудай дейт! Кимибиз озунабыз, аны да Кудай билет! Айрым "достор", ичиңерде ит өлүп жүргөнүн билчүмүн, бирок көр дүйнөнүн артынан мынча түшөрүңөрдү билбептирмин, ошол акча, бийлик менен тирүү калмак белеңер, силер да барасыңар Кудай алдына!" - деп жазган Алтымышев.

Тынчтык Алтымышев журналист жана жаран катары акыркы айларда бийликтин жүргүзүп жаткан саясатына бир катар курч сын-пикирлерди айтып келген.