Ош. Шаар бюджети пландагыдан дагы 30 пайызга көбөйтүлөт

Ош шаарынын бюджети пландагыдан дагы 30 пайызга көбөйтүлөт. Бул тууралуу мэр Таалайбек Сарыбашов 6-август күнү жергиликтүү бюджеттин киреше бөлүгүн көбөйтүү боюнча тийиштүү кызматтар менен болгон жыйында билдирди.

Мэриянын маалымат кызматынан кабарлашкандай, шаар башчысы унаалардан төлөгөн салыктар боюнча 1-сентябрга чейин жол кайгуул жана салык кызматынын өкүлдөрүн атайын рейд уюштуруп, айдоочуларга түшүндүрүү иштерин жүргүзүү менен салык топтоону сунуштады. Ошондой эле көмүскөдө жаткан салык төлөөчүлөрдү, үй шартында иштеп жаткан коммерциялык багыттагы ишканаларды мыйзамдаштыруу боюнча катуу талаптар коюлду. Мындан тышкары тийиштүү кызматтарга тез аранын ичинде жыйымдарды толугу менен өз убагында жыйноо боюнча механизмдерди иштеп чыгып, элдерге ыңгайлуу шарт түзүп берүү менен салык топтоп ар айдын аягында отчёт даярдоо тапшырмасы берилди.

Жыйындын соңунда Ош шаарында бекитилген жергиликтүү бюджеттин көлөмүн дагы 30 пайызга жогорулатуу боюнча милдеттер коюлду.

Ош шаарынын 2018-жылга карата бюджетинин көлөмү бюджеттик мекемелердин атайын каражаттарын кошпогондо 860 миллион сомго шаардык кеңеш тарабынан бекитилген. Бул сумма 2017-жылга салыштырмалуу 101 миллион сомго көбөйгөн.