Кыргыз оор атлетчи Иззат Артыков Индонезияда өтүүчү Жайкы Азия оюндарына даярданууда

Кыргыз оор атлетчи Иззат Артыков Индонезияда өтүүчү Жайкы Азия оюндарына даярданууда. Бул тууралуу SUPER.KG порталына Жаштар иштери, дене тарбия жана спорт агенттигинен билдирди.

18-август - 2-сентябрь аралыгында Индонезиянын Жакарта жана Палембанг шаарларында өтүүчү Жайкы Азия оюндарында оор атлетика боюнча мелдеште Кыргыз өлкөсүнөн 3 спортчу катышат. Алардын арасында өлкөбүздүн атактуу оор атлети Иззат Артыков бар. Азыркы тапта оор атлетика боюнча Кыргыз курама командасы Ысык-Көлдүн Кажы-Сай айылында окуу-машыгуу жыйындарын өткөрүүдө. Жыйынга өлкөбүздөн 4 спортчу чакырылган.

Белгилей кетсек, Иззат Артыков Бразилияда өткөн Жайкы "Рио-де-Жанейро-2016" Олимпиадасында коло медаль жеңип алган. Бирок 8 күн өткөн соң ал допинг колдонгон деп айыпталып, Олимпиада оюндарынан четтетилген. Эл аралык олимпиадалык комитет Иззат Артыковдун канынан стрихнин затын таап алган.

Окуу-машыгуу жыйындарына чакырылган Кыргыз курамасы:

48 килограмм салмак ченинде: Жаңыл Окоева - эл аралык даражадагы спорт чебери;

56 килограмм салмак ченинде: Чойбек Сартбаев - спорт чебери;

69 килограмм салмак ченинде: Иззат Артыков - эл аралык даражадагы спорт чебери;

94 килограмм салмак ченинде: Бекдөөлөт Расулбеков - спорт чебери;

Башкы машыктыруучу: Камбар Токтоналиев.